انجمن کا تعارف

انجمن ترقی اردو (ہند) کی شبلی میموریل لائبریری میں نادر کتابوں اور نایاب تر مخطوطات کا اہم خزانہ ہے۔

انجمن ترقی اردو (ہند) کی جانب سے 1936 میں انجمن کے مرکزی دفتر کے اورنگ آباد سے دلّی منتقل ہونے کے بعد ایک شاندار لائبریری کے قیام کے لیے اردو کتابوں کے عطیے کی اپیل کے ساتھ ساتھ ادارے ہی سے شائع کی گئی نایاب کتابوں نیز خریدی گئی کتابوں اور مخطوطات کی وجہ سے انجمن ترقی اردو (ہند) کے کتب خانے میں جلد ہی اردو کتابوں کے ساتھ عربی، فارسی اور اردو کے مخطوطات کا ایک قابلِ رشک ذخیرہ اہلِ علم کے استفادے کے لیے جمع ہوگیا تھا، جسے بدقسمتی سے تقسیم کے پُرآشوب دور میں بلوائیوں نے نذرِ آتش کردیا۔ 1949 میں انجمن کی شبلی میموریل لائبریری کو نئے سرے سے اہم کتابوں اور نادر مخطوطات سے مزین کرنے کا کام شروع ہوا اور جلد ہی عطیات کی صورت میں مخطوطات اور اہم کتابیں جمع ہوگئیں۔ انجمن نے مختلف ذرائع سے اپنی شائع شدہ کتابوں کو حاصل کرکے نہ صرف شائع کیا بلکہ اپنے اشاعتی پروگرام کو نہایت منظم طریقے پر توسیع پذیر کیا۔

1999 میں ایران کلچر ہاؤس کے فارسی ریسرچ سنٹر نے انجمن کی لائبریری میں موجود فارسی مخطوطات کی ایک وضاحتی فہرست تیار کی تھی جو شائع ہوچکی ہے۔ سال 2023 میں انجمن کے مرکزی دفتر کے مکمل طور پر تجدید کے عمل میں لائبریری کے نظام کی جدیدکاری بھی کی گئی تاکہ جدید ترین سہولیات کے ذریعے قارئین کی اس کے قیمتی علمی وسائل تک بہ آسانی رسائی ہوسکے۔ rekhta.org نے اپنی ویب سائٹ پر ایک صفحہ انجمن کی لائبریری کی ڈیجیٹائز کی گئی کتابوں کے لیے اس وجہ سے ہی مختص کیا ہے کیوں کہ انجمن نے ہی سب سے پہلے ریختہ کو اپنی لائبریری ڈیجیٹائز کرنے کی اجازت دی تھی جس سے ریختہ کا لٹریری کورپس تیار ہوسکا۔ اس صفحے کا لنک یہ ہے: مزید…